Sukoot e Sham e Khizan Hai , Qareeb Aa Jao Bada Udas Saman Hai Qareeb Aa Jao
سکوتِ شامِ خزاں ہے، قریب آ جاؤ
بڑا اداس سماں ہے قریب آ جاؤ
Sukoot e Sham e Khizan Hai , Qareeb Aa Jao
Bada Udas Saman Hai Qareeb Aa Jao
نہ تم کو خود پہ بھروسہ، نہ ہم کو زعمِ وفا
نہ اعتبارِ جہاں ہے قریب آ جاؤ
رہِ طلب میں کسی کو کسی کا دھیان نہیں
ہجومِ ہمسفراں ہے قریب آ جاؤ
جو دشتِ عشق میں بچھڑے، وہ عمر بھر نہ ملے
یہاں دھواں ہی دھواں ہے قریب آ جاؤ
یہ آندھیاں ہیں تو شہرِ وفا کی خیر نہیں
زمانہ خاک فشاں ہے قریب آ جاؤ
فقیہِ شہر کی مجلس نہیں کہ دور رہو
یہ بزمِ پیرِ مغاں ہے، قریب آ جاؤ
فرازؔ دور کے سورج غروب سمجھے گئے
یہ دورِ کم نظراں ہے قریب آ جاؤ
احمد فرازؔ
Ahmad Faraz
Comments
Post a Comment