Chehra Udaas Udaas Tha Maila Libaas Tha , Kia Din Thay Jab Khayal Tamanna Libas Tha

 چہرہ اداس اداس تھا میلا لباس تھا
کیا دن تھے جب خیال تمنا لباس تھا

عریاں زمانہ گیر شررگوں جبلتیں
کچھ تھا تو ایک برگ دل ان کا لباس تھا

اس موڑ پر ابھی جسے دیکھا ہے کون تھا
سنبھلی ہوئی نگاہ تھی سادہ لباس تھا

یادوں کے دھندلے دیس کھلی چاندنی میں رات
تیرا سکوت کس کی صدا کا لباس تھا

ایسے بھی لوگ ہیں جنہیں پرکھا تو ان کی روح
بے پیرہن تھی جسم سراپا لباس تھا

صدیوں کے گھاٹ پر بھرے میلوں کی بھیڑ میں
اے درد شادماں ترا کیا کیا لباس تھا

دیکھا تو دل کے سامنے سایوں کے جشن میں
ہر عکس آرزو کا انوکھا لباس تھا

امجد قبائے شہ تھی کہ چولا فقیر کا
ہر بھیس میں ضمیر کا پردا لباس تھا

مجید امجد