Main Woh Diya Hoon Jo Sooraj Ki Soch Sochta Hai Jo Chahta Hai Keh Roshan Jahan Ho Jae

جو سوچتا ہوں اگر وہ بیان ہو جائے
تو پانی پانی یہ سارا جہان ہو جائے

گلہ ہے آنکھ سے ان کو زبان سے ہے گلہ
قلم کو حکم ہے وہ بے زبان ہو جائے

وہاں پہ راستہ ہجرت ہی صرف ہوتا ہے
جہاں زمین یہ خود آسمان ہو جائے

تو خود ہی سوچ ذرا حال اس گلستاں کا
ِخزاں کے ساتھ جہاں باغبان ہو جائے

کہاں تلک بھلا اترے کوئی امیدوں پر
کہ سانس سانس جہاں امتحان ہو جائے

یوں ختم ہوتا ہے کردار بار بار مرا
کہ بیچ میں ہی ختم داستان ہو جائے

اندھیری رات صدا دے رہی ہے آندھی کو
ہے پھر بھی ضد کہ دیا خوش گمان ہو جائے

میں وہ دیا ہوں جو سورج کی سوچ سوچتا ہے
جو چاہتا ہے کہ روشن جہان ہو جائے

زمانہ لاکھ برا چاہے خواب توڑے مگر
خدا سے کیسے کوئی بد گمان ہو جائے

میں کیسے مان لوں اس کو برا یہاں ابرک
خلاف جس کے جہاں یک زبان ہو جائے

  اتباف ابرک