Aqal Kehti Hai Keh Chal Door Hai Manzil Teri Dil Ye Kehta Hai Tujhe Mudke Pukara Jaye

کیسے ٹکڑوں میں کوئی شخص سنبھالا جائے
جس نے جانا ہے کہو سارے کا سارا جائے

جب ہے برسات کسی اور کے آنگن کے لئے
اس کا کیچڑ بھی مرے گھر نہ اتارا جائے

ہے بری بات یہ سرگوشیاں محفل کو بتا
سرِ بازار مرا قصہ اچھالا جائے

زندگی میری ہے تو مجھ کو عطا کی جائے
ہے مرا حق تو مجھے اور نہ ٹالا جائے

شور اٹھتا ہے رگ و جاں سے تو دل پوچھتا ہے
خالی زندان سے اب کس کو نکالا جائے

عقل کہتی ہے کہ چل دور ہے منزل تیری
دل یہ کہتا ہے تجھے مڑ کے پکارا جائے

چاہ جینے کی ہے تو ، مشورہ ہے یہ ابرک
آستیں میں بھی کوئی سانپ نہ پالا جائے

اتباف ابرک

اضافی اشعار

اس طرح وقت کو شیشے میں اتارا جائے
جس طرف جاؤں اسی سمت نظارہ جائے

کچھ سروکار نہیں دنیا کو دنیا سے مگر
بس تفنن کے لئے عیب اچھالا جائے

بھول جاتا ہوں میں تقدیر سمجھ کر، اس کو
جس کے منہ میں مرے حصے کا نوالہ جائے