Utaarta hoon, ghar aa kar, main jab safar ki thakan To baam-o-dar se utarti hai mujh pe ghar ki thakan

غزل
اُتارتا ہوں، گھر آ کر، میں جب سفر کی تھکن
تو بام و در سے اُترتی ہے مجھ پہ گھر کی تھکن
ہمیں، ہماری تھکن دیجیے، خدا کے لئے
تھکے ہوئے ہیں اُٹھا کر، اِدھر اُدھر کی تھکن
یہ غیر ارادی مشقت معاف کی جائے
یہ سانس کھینچتے رہنا ، یہ عمر بھر کی تھکن
نہ انتظار ہی بھگتا کبھی نہ ہجر کوئی
بِلاجواز ہے تم میں سے بیشتر کی تھکن
ثمر اتار دیئے اور برگ جھاڑ دیئے
ہوا کا شکریہ ، کم کر گئی شجر کی تھکن
کسی نے تھپکا نہیں دستکوں کی صورت اِسے
سمجھ نہ آئے گی تم کو ہمارے در کی تھکن
تھکن کے ڈر میں کٹے جا رہی ہے عمر، افسوس
اور اتنا ڈر کہ ہے طاری بدن پہ ڈر کی تھکن
کسی کو دیکھ رہا ہوں مسلسل ،اور، عمیر
اتر رہی ہے مسلسل مری نظر کی تھکن 
عمیر نجمی

 Ghazal
Utaarta hoon, ghar aa kar, main jab safar ki thakan
To baam-o-dar se utarti hai mujh pe ghar ki thakan
Hamain, hamari thakan dijye, Khuda k liay
Thakay huay hain utha kar, idhar udhar ki thakan
Ye ghair iraadi mashaqqat, muaaf ki jaye
Ye saans khainchtay rehna, ye umr bhar ki thakan
Na intezar hi bhugta kabhi na hijr koi
Bilajawaaz hai tum main se baishtar ki thakan
Samar utaar diay or barg jhaar diay
Hawa ka shukrya, kam kar gayi shajar ki thakan
Kisi ne thapka nahin dastakon ki surat isay
Samajh na ayegi tum ko hamaray dar ki thakan
Thakan k dar main katay ja rahi hai umr, afsos
Or Itna dar k hai taari badan pe dar ki thakan
Kisi ko dekh raha hoon musalsal, aur, Umair
Utar rahi hai musalsal meri nazar ki thakan
Umair Najmi