Har Ik Nazar Mein Kuch Tahayuraat Mily

ہر اک نظر میں نئے کچھ تحیّرات ملے
کسی کی آنکھوں میں ہمکو طلسمات ملے
کبھی نہ ختم ہو ہم ایسی شب کے باسی ہیں
ہو جس کے بعد سحر کوئی ایسی رات ملے
سکون قلب سے یہ کایٔنات خالی ہے
تلاش میں ہوں نئی کوئی کائنات ملے
نتیجے عشق کی بازی کے مختلف تو نہیں
خدا سے موت ملے یا خودی سے مات ملے
پلٹ کے رکھ دیا رُخ  زندگی کی گاڑی کا
سفر میں عُمر کے کچھ ایسے حادثات ملے
اُتر گئے جو محبّت کے رنگ تھے کچّے
اٹوٹ لگتے تھے رشتے وہ بے ثبات ملے
دوبارہ عشق میں کر لوں مگر ملے تو کوئی
ہنسے تو تجھ سا دِکھے تجھ سے کوئی بات ملے
وہ جن کو دیکھ کے تاریخ کی زباں گنگ ہے
ہمارے دور میں ارشد وہ سانحات ملے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania