Jashn barbad khayalon ka manaa loon to chaloon Muydah e shauq ko ghamsaz bana loon to chaloon

جشن برباد خیالوں کا منا لوں تو چلوں
مژدۂ شوق کو غمساز بنا لوں تو چلوں

میری ہستی میں سمٹ آئے اندھیرے غم کے
شمع الفت کی ترے غم میں جلا لوں تو چلوں

دلِ بیتاب، ٹھہر، اشکِ تمنّا کے طفیل
بزمِ فرقت کو سرشام سجا لوں تو چلوں

کیف طاری ہے بہت آج تصور میں ترے
اب ذرا ہوش کے ماحول میں آ لوں تو چلوں

ان کا دیدار مرے بس کا ابھی کام نہیں
اپنی نظروں سے حجابات اٹھا لوں تو چلوں

ابھی سیلاب پہ دریا ہے سفینہ بردوش
میں کسی موج کی آغوش میں آ لوں تو چلوں

جلوہ گر سامنے ہے آج مبین ان کا جمال
پیاس آنکھوں کی ذرا اور بجھا لوں تو چلوں
مبین علوی خیر آبادی

Jashn barbad khayalon ka manaa loon to chaloon
Muydah e shauq ko ghamsaz bana loon to chaloon

Meri hasti mein simat aye andhere gham ke
Shama ulfat ki tere gham mein jalaa loon to chaloon

Dil e betab thehr, ashk e tamanna ke tufail
Bazm e furqat ko sar e sham saja loon to chaloon

Kaif taari hai bohat aj tasavvur mein tere
Ab zara hosh ke mahaul mein aa loon to chaloon

Un ka deedar mere bas ka abhi kaam nahi
Apni nazron se hijabat utha loon to chaloon

Abhi sailab ba dariya hai safeena bardosh
Main kisi mauj ki aghosh mein aa loon to chaloon

Jalwa gar samne hai aj Mubeen un ka jamal
Piyas ankhon ki zara aur bujha loon to chaloon
Mubeen Alvi Khair Abadi