Muhabbat mein shab e tareek e hijran kaun dekhe ga Hami dekhen ge, ye khwab e pareshan kaun dekhe ga

محبّت میں شبِ تاریکِ ہِجراں کون دیکھے گا
ہمِیں دیکھیں گے، یہ خوابِ پریشاں کون دیکھے گا

اِن آنکھوں سے تجلّی کو درخشاں کون دیکھے گا
اُٹھا بھی دو نقاب رُوۓ تاباں، کون دیکھے گا

یہی اِک رات ہے بس کائناتِ زِندگی اپنی
سَحر ہوتی ہُوئی اے شامِ ہِجراں، کون دیکھے گا

چمن میں گِر رہی ہیں بِجلیاں شاخِ نشیمن پر
یہاں تک اپنی بربادی کا ساماں کون دیکھے گا

بسانا ہی پڑے گا اِک نہ اِک دِن خانۂ دِل کو
بنے پِھرتے ہو یوسف، شامِ زِنداں کون دیکھے گا

حقیقت میں تقاضہ بھی یہی ہے پردہ داری کا
رہو تُم آنکھ کے پردوں میں پِنہاں، کون دیکھے گا

کُچھ ایسا ہو دمِ آخِر نہ آئیں وہ عیادت کو
اُنہیں اپنے کیے پر یوں پشیماں کون دیکھے گا

مُجھی پر آئے گا اِلزام مِری پائمالی کا
تِری رفتار کو اے فِتنہ ساماں، کون دیکھے گا

جو غُنچے کل کِھلے تھے، آج وہ مُرجھاۓ جاتے ہیں
مِری نظروں سے رنگِ بزمِ اِمکاں کون دیکھے گا

یہی اب بھی صدائیں آتی ہیں وادئ ایمن سے
کہاں ہیں طالب دیدارِ جاناں کون دیکھے گا

نفس کے ساتھ ہی قیدِ تعلّق ٹُوٹ جاتی ہے
پلٹ کر پِھر سُوۓ گورِ غریباں کون دیکھے گا

عذابِ حشر سے تُو کیوں ڈراتا ہے مُجھے واعظ
تُجھے معلُوم بھی ہے، فردِ عِصیاں کون دیکھے گا
مخمور دہلوی

Muhabbat mein shab e tareek e hijran kaun dekhe ga
Hami dekhen ge, ye khwab e pareshan kaun dekhe ga

In ankhon se tajalli ko darakhshan kaun dekhe ga
Utha bhi do niqab e ru e taban kaun dekhe ga

Yehi ek rat hai bas kaiynat e zindagi apni
Sehr hoti hui ay sham e hijran, kaun dekhe ga

Chaman mein gir rahi hain bijliyan shakh e nasheman par
Yahan tak apni barbadi ka saman kaun dekhe ga

Basana hi pade ga ek na ek din khana e dil ko
Bane phirte ho Yousuf, sham e zindan kaun dekhe ga

Haqeeqat mein taqaza bhi yehi hai pardah daari ka
Raho tum ankh ke pardon mein pinhan, kaun dekhe ga

Kuch aisa ho dam e akhir na ayen wo ayadat ko
Unhen apne kiye par youn pasheman kaun dekhe ga

Mujhi pe aye ga ilzam meri payemali ka
Teri raftar ko ay fitna saman, kaun dekhe ga

Jo ghunche kal khhile thay, aj wo murjhaye jate hain
Meri nazron se rang e bazm e imkan kaun dekhe ga

Yehi ab bhi sadayen ati hain Wadi e Aimen se
Kahan hain talib e deedar e janan, kaun dekhe ga

Nafs ke sath hi qaid e talluq toot jati hai
Palat kar phir su e goar e ghareeban kaun dekhe ga

Azab e hashr se tu kyun darata hai mujhe wa’iz
Tujh e maloom bhi hai, fard e isiyan kaun dekhe ga
Makhmoor Dehlvi