دبی سی آرزو دل کی میرا ارمان بن جائے
کہیں ایسا نہ ہو یہ لہر اک طوفان بن جائے
تجھے پا کر نجانے کیوں میرے دل کو ہیں اندیشے
تیری یہ مُسکراہٹ بھی کہیں احسان بن جائے
کبھی یہ مرحلہ آۓ میری جاں اس محبّت میں
میں تیری جان بن جاؤں تُو میری جان بن جائے
شرارت اُسکی باتوں میں قیامت اک اداؤں میں
کبھی انجان بن جائے کبھی نادان بن جائے
غزل ہوتی ہے جب عاشق کرے محبوب سے باتیں
خُدا ہو جب مُخاطب حرف وہ قُرآن بن جائے
تمنّا پھر وہی جاگی جب آیا ہوش میں ارشد
میری دیوانگی ہی اب میری پہچان بن جائے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
No comments:
Post a Comment