Toote Hoe Khuwabon Ki Chubhan Kam Nahi Hoti Ab Ro Ke Bhi Aankhon Ki Jalan Kam Nahi Hoti

ٹُوٹے ہوئے خوابوں کی چُبھن کم نہیں ہوتی
اب رو کے بھی آنکھوں کی جلن کم نہیں ہوتی
کتنے بھی گھنیرے ہوں تِری زُلف کے سائے
اِک رات میں صدیوں کی تھکن کم نہیں ہوتی
ہونٹوں سے پئیں، چاہے نگاہوں سے چُرائیں
ظالم تِری خوشبوئے بدن کم نہیں ہوتی
مِلنا ہے تو مِل جاؤ یہیں حشر میں کیا ہے
اِک عُمر مِرے وعدہ شکن کم نہیں ہوتی
قیصرؔ کی غزل سے بھی نہ ٹُوٹی یہ روایت
اِس شہر میں نا قدرئ فن کم نہیں ہوتی