الہٰی! تیری چوکھٹ پر بھکارن بن کے آئی ہوں
سراپا فقر ہوں ، عجز و ندامت ساتھ لائی ہوں
لٹا کر ساری پونجی غفلت و عصیاں کی دلدل میں
سہارا لینے آئی ہوں ترے کعبے کے آنچل میں
کہاں سے لاؤں طاقت دل کی سچی ترجمانی کی
کہ کس جنجال میں گزری ہیں گھڑیاں زندگانی کی
ترے دربار میں لائی ہوں اب اپنی زبوں حالی
تری چوکھٹ کے لائق ہر عمل سے ہاتھ ہے خالی
تری چوکھٹ کے جو آداب ہیں میں ان سے خالی ہوں
نہیں جس کو سلیقہ مانگنے کا وہ سوالی ہوں
یہ تیرا گھر ہے ، تیرے مہر کا دربار ہے مولیٰ
سراپا نور ہے اک مہبطِ انوار ہے مولیٰ
زباں غرقِ ندامت دل کی ناقص ترجمانی پر
خدایا رحم میری اس زبانِ بے زبانی پر
No comments:
Post a Comment