اُن کا ہی تصور ہے محفل ہو کہ تنہائی
سمجھے کوئی دیوانہ جانے کوئی سودائی
نغموں کا بھرم ٹوٹا، میخانے کا در چھوٹا
جب ساز چھڑا کوئی آواز تیری آئی
تو آئے، تجھے دیکھوں اور جاں سے گزرجاؤں
اس آس پہ زندہ ہے اب تک تیرا شیدائی
پہلے سے مراسم تو باقی نہ رہے پھر بھی
جب زخم لگا کوئی کیوں یاد تیری آئی
اس شہر کا میخانہ دنیا سے نرالا تھا
ساقی بھی تھا ہرجائی، میخانہ بھی ہرجائی
تسلیم فاضلی
No comments:
Post a Comment