Mujhe Jab Bhi Woh Galiyan Aur Woh Rasta Yaad Aata Hai Koi Dhundla Sa Manzar Hai Jo Ujla Yaad Aata Hai

 

مجھے جب بھی وہ گلیاں اور وہ رستہ یاد آتا ہے
کوئی دھندلا سا منظر ہے جو اجلا یاد آتا ہے

فضائے دل پہ طاری ہے بہت ہی حبس کا موسم
تری قربت کی خوشبو کا وہ جھونکا یاد آتا ہے

خزاں رت ہے مگر مجھ کو خیالوں کے تسلسل میں
محبت کے گلابوں کا وہ سپنا یاد آتا ہے

کسی کے دکھ بھرے لمحے میں جب کوئی بلکتا ہے
حقیقت میں اسے ہر زخم اپنا یاد آتا ہے

مسلسل ریت پر چلنا وفا کی ریت ٹھہری ہے
تری دہلیز تک پھیلا وہ صحرا یاد آتا ہے

وہ لمحہ جو گزرتے موسموں میں ساتھ ٹھہرا ہے
مجھے خود بھی نہیں معلوم کتنا یاد آتا ہے

ترا ہی عکس اترا ہے مری نظموں میں، غزلوں میں
وہ لہجہ تیری چاہت کا وہ چہرہ یاد آتا ہے

مرے آنگن میں جب بھی شام کے سائے اترتے ہیں
مجھے شاہیںؔ محبت کا ہی سایہ یاد آتا ہے
ڈاکٹر نجمہ شاہین کھوسہ