Mere Chehre Ki Udasi Ko Chupa Sakti Ho Aik Khushrang See Tasweer Bana Sakti Ho

میرے چہرے کی اداسی کو چھپا سکتی ہو
ایک خوش رنگ سی تصویر بنا سکتی ہو
Mere Chehre Ki Udasi Ko Chupa Sakti Ho
Aik Khushrang See Tasweer Bana Sakti Ho

 
میری آ نکھوں میں تو اک دشت سی ویرانی ہے
تم اگر چاہو کوئی خواب دکھا سکتی ہو

اس کے اس پار بھی اپنے ہیں کوئی غیر نہیں
کب سے حائل ہے یہ دیوار گرا سکتی ہو

وہ جو اک دشتِ تمنا میں گزرے تھے کبھی
وہ مہ و سال میرے ڈھونڈ کے لا سکتی ہو

ایک کردار ہوں میں رنج و الم کا مارا
اپنے اس عشق گرفتہ کو بھلا سکتی ہو

دھند گہری ہے بہت، پاس رہو دھیان رہے
ہاتھ چھوٹا تو بہت دور بھی جا سکتی ہو

شہر آشوب سی صورت ہے ہمارے دل کی
تم بھی چاہو تو اسے آ گ لگا سکتی ہو

خوب اس عشق کے دستور سے واقف ہیں ہم
دل کا جو بھید ہے تم کھل کے بتا سکتی ہو