Mere Dil Ke Hast o Kushad Mein Yeh Namod Kaisi Namo Ki Hai Kabhi Aik Dajla Hai Khoon Ka , Kabhi Aik Boond Lahoo Ki Hai

مرے دل کے بست و کشاد میں یہ نمود کیسی نمو کی ہے
کبھی ایک دجلہ ہے خون کا، کبھی ایک بوند لہو کی ہے
Mere Dil Ke Hast o Kushad Mein Yeh Namod Kaisi Namo Ki Hai
Kabhi Aik Dajla Hai Khoon Ka , Kabhi Aik Boond Lahoo Ki Hai
کبھی چاک خوں سے چپک گیا کبھی خار خار پرو لیا
مرے بخیہ گر نہ ہوں معترض کہ یہ شکل بھی تو رفو کی ہے

نہ بہار اْن کی بہار نہ وہ آشیاں کے، نہ باغ کے
جنہیں ذکر قید و قفس کا ہے، جنہیں فکر طوق و گلو کی ہے

یہی راہگزر ہے بہار کی یہی راستہ ہے بہار کا
یہ چمن سے تا بدِ قفس جو لکیر میرے لہو کی ہے

نہ جنوں، نہ شورِ جنوں رہا، ترے وحشیوں کو ہوا ہے کیا
یہ فضاۓ دہر تو منتظر فقط ایک نعرۂ ہو کی ہے

ہمیں عمر بھر بھی نہ مل سکی کبھی اک گھڑی سکون کی
دلِ زخم زخم میں چارہ گر کوئی اک جگہ بھی رفو کی ہے ؟

تری چشمِ مست نے ساقیا وہ نظامِ کیف بدل دیا
مگر آج بھی سرِ میکدہ وہی رسم جام و سبوْ کی ہے

میں ہزار سوختہ جاں سہی، مرے لب پہ لاکھ فغاں سہی
ابھی نا امیدِ عشق نہ ہو ابھی دل میں بوند لہو کی ہے

ابھی رِند ہے، ابھی پارسا تجھے تابؔش آج ہوا ہے کیا
کبھی جستجو مے و جام کی، کبھی فکر آب و وضو کی ہے
تابؔش دہلوی
Tabish Dehlvi