Ab Kahan Aur Kisi Cheez Ki Ja Rakhi Hai Dil Mein Ik Teri Tamanna Jo Basa Rakhi Hai

اب کہاں اور کسی چیز کی جا رکھی ہے
دل میں اک تیری تمنا جو بسا رکھی ہے
Ab Kahan Aur Kisi Cheez Ki Ja Rakhi Hai
Dil Mein Ik Teri Tamanna Jo Basa Rakhi Hai
سر بکف میں بھی ہوں، شمشیر بکف ہے تو بھی
تو نے کس دن پہ یہ تقریب اٹھا رکھی ہے

دل سلگتا ہے ترے سرد رویے سے مرا
دیکھ اس برف نے کیا آگ لگا رکھی ہے

آئینہ دیکھ ذرا کیا میں غلط کہتا ہوں
تو نے خود سے بھی کوئی بات چھپا رکھی ہے

جیسے تو حکم کرے، دل مرا ویسے دھڑکے
یہ گھڑی تیرے اشاروں سے ملا رکھی ہے

گوہر اشک سے خالی نہیں آنکھیں انورؔ
یہی پونجی تو زمانے سے بچا رکھی ہے
انورؔ مسعود
Anwar Masood