Koi Dum , Koi Dua Koi Wazeefa Aata Jis Se Aafat Mein Hansne Ka Tareeqa Aata

کوئی دم، کوئی دعا کوئی وظیفہ آتا
جس سے آفات میں ہنسنے کا طریقہ آتا
Koi Dum , Koi Dua Koi Wazeefa Aata
Jis Se Aafat Mein Hansne Ka Tareeqa Aata
بہتری ہوتی نہ مقصود اگر دنیا کی
آسماں سے کوئی رہبر، نہ صحیفہ آتا

داخلہ ہو گیا نفرت کے کسی کالج میں
اس سے پہلے کہ محبت کا نتیجہ آتا

خار ہو، سنگ ہو، وحشی ہو کہ آدم بیزار
بزمِ جاناں سے نہیں کوئی کبیدہ آتا

اس لیے رکھا اناؤں کا بھرم اپنے بیچ
ہم انا چھوڑ بھی دیتے تو قبیلہ آتا

اثر انداز تپش ہوتی ہے گل پر کیسے
میں نے اس چہرے پہ دیکھا ہے پسینہ آتا

چومنے لگتا ہوں رخسار جبیں سے پہلے
کیوں نہیں مجھ کو محبت کا سلیقہ آتا

اسی گرداب میں خوش رہتے قمر آسیؔ ہم
نیند آتی نہ سرِ خواب جزیرہ آتا
قمرآسیؔ
Qamar Aasi