Yahi Nahi Keh Faqat Bal o Par Nahi Rehty Ab Udne Wale Parendon Ke Sar Nahi Rehty

یہی نہیں کہ فقط بال و پَر نہیں رہتے
اب اُڑنے والے پرندوں کے سَر نہیں رہتے
Yahi Nahi Keh Faqat Bal o Par Nahi Rehty
Ab Udne Wale Parendon Ke Sar Nahi Rehty
یہ جِن کی سسکیاں فُٹ پاتھ پر ہیں بکھری ہوئی
یہ کون لوگ ہیں کیوں اپنے گھر نہیں رہتے

ہمارے دوست فراموش کر چکے ہیں ہمیں
ہم اپنے شہر میں رہتے ہیں پر نہیں رہتے

بتایا روتے ہوئے در نے میری دستک کو
کہ اِس مکاں کے مکیں اب اِدھر نہیں رہتے

مسافرت میں ہوئی رات جب تو ہم پہ کھلا
کہ اب چراغ سرِ رہگذر نہیں رہتے

جو آج خود کو سمجھتے ہیں رونق ِ ہستی
سمے گزرتا ہے اور بیشتر نہیں رہتے

کوئی نقاب نہیں اور کوئی حجاب نہیں
تمہارے شہر میں کیا بد نظر نہیں رہتے

وہ دیکھ غور سے آنکھیں ملنگ بابا کی
جو اِن میں جھانک لیں، وہ بے خبر نہیں رہتے

بتا رہی ہے یہ آرائشِ غزل واصفؔ
سخن کدوں میں اب اہلِ ہنر نہیں رہتے
جبّار واصفؔ
Jabbar Wasif