Dil Yun Hi Ehtemaam Karta Hai Woh Kahan Ab Qiyaam Karta Hai

دل یونہی اہتمام کرتا ہے
وہ کہاں اب قیام کرتا ہے

تھا گماں ہم کو مہربان ہے دل
دل تو جینا حرام کرتا ہے

کیا دلیلیں کریں، مقابل جب
چشمِ تر سے کلام کرتا ہے

ایک لمحہ یقین جس پہ کرو
کام وہ ہی تمام کرتا ہے

کون دیکھے گا کل نظر بھر کے
آج مطلب سلام کرتا ہے

اف ہنر مندیاں زمانے کی
دل بدلنے کا کام کرتا ہے

ہاتھ پر ہاتھ دھر کے بیٹھے ہیں
عشق میں کون کام کرتا ہے

آپ کیا چیز ہیں مرے ابرک
دل تو حاکم غلام کرتا ہے

اتباف ابرک