Bazm Itni Bujhi Bujhi Kion Hai

بزم اِتنی بُجھی بُجھی  کیوں ہے
کُچھ تو کہیے یہ خامشی کیوں ہے
دوست ہو میرے میں نے مان لیا
میرے دُشمن سے دوستی کیوں ہے
شکریہ اپنی بزم میں لاۓ
پر یہاں آپ کی کَمی کیوں ہے
خُوب ہے مۓ  حجاز کی ساقی
 اتنی پی کر بھی تشنگی کیوں ہے
تُو جو کہتا ہے دُور جانے کا
دل میں اک چیز ٹوُٹتی کیوں ہے
سوچتے سوچتے یہ ہی گزری
زندگی کیا ہے زندگی کیوں ہے
میرا اپنا تھا جو کبھی ارشد
آج وہ شخص اجنبی کیوں ہے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania