Yaadon Ke Sewa Aur Mere Paas Kuch Nahi

یادوں کے سوا اور میرے پاس کچھ نہیں
ہیں زخم مگر درد کا احساس کچھ نہیں
زنداں میں فقط ایک ہے زنجیر کی آواز
اُمید ہے نہ کوئی ہمیں آس  کچھ نہیں
اُجڑا ہے ترے بعد محبّت کا چمن یوں
اِک خشک ندی اور نِری گھانس، کچھ نہیں
ہیں اب بھی تصور میں وہی تیری ادائیں
آغوش ہے نہ خوشبوۓ انفاس کچھ نہیں
ارشد یہ کُھلا راز کہ محدود تھی  دنیا
بس ایک خُدا اور مرے پاس کچھ نہیں
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania