نس نس میں کوئی پھر سے رواں ہونے لگا ہے
اف ! پھر سے وہی کارِ زیاں ہونے لگا ہے
مشکل سے نکالا تھا ابھی وہم سے خود کو
پہلے سے کہیں بڑھ کے گماں ہونے لگا ہے
کتنوں کو ہی سمجھا کہ بدل ہیں وہ تمہارا
لیکن کوئی تم جیسا کہاں ہونے لگا ہے
اتنا تھا مرے بس میں کہ میں آگ بجھا دوں
بے بس ہوں اگر بجھ کے دھواں ہونے لگا ہے
جس خواب کو جینے کے لئے مرتے تھے کل تک
اب خواب وہی بارِ گراں ہونے لگا ہے
کاٹی بھی زباں ہم نے مگر کیا کریں ابرک
آنکھوں سے وہ ہٹ دھرم بیاں ہونے لگا ہے
اتباف ابرک
No comments:
Post a Comment