صدا دے رہے ہیں گماں میرے اندر
محبت نہ بھر دے دھواں میرے اندر
زمانہ مری بات سننے لگا ہے
یہ رکھ دی ہے کس نے زباں میرے اندر
اٹھایا ذرا موجِ تنہائی نے سر
سمندر ہوا بیکراں میرے اندر
ترا ساتھ پا کر کھلے گل یقیں کے
گلابی رہے گا سماں میرے اندر
اسے میں نے نفرت سے ٹھکرا دیا تھا
رکی پر نہیں داستاں میرے اندر
وہی دسترس کے مسائل ہیں باہر
وہی خواہشِ آشیاں میرے اندر
بہ طرزِ سخن ٹمٹمانے لگا ہے
مکیں تھا جو اک لامکاں میرے اندر
خدا اس کو رکھے کہ رکھی ہے جس نے
ردا میرے سر کہکشاں میرے اندر
ردا اعجاز
Rida Aijaz
No comments:
Post a Comment