Aasman Dar Peh Mere Sajdah-Kunan Hota Tha Is Faqeeri Mein Bhi Dil Rashk e Shahan Hota Tha

آسماں در پہ مرے سجدہ کناں ہوتا تھا
اس فقیری میں بھی دل رشکِ شہاں ہوتا تھا

تو قریں تھا تو عجب دل کا سماں ہوتا تھا
تب خزاں پر بھی بہاروں کا گماں ہوتا تھا

دل کے آنگن میں تری یاد کے گل کھلتے تھے
بس ترا ذکر سرِ نوکِ زباں ہوتا تھا

ہم تو ہر رنج چھپا لیتے مگر ہجر کا غم
درد ایسا تھا جو آنکھوں سے عیاں ہوتا تھا

ضبطِ الفت میں گزارے ہیں کئی دن نسریںؔ
حالِ دل جب فقط اشکوں سے بیاں ہوتا تھا
نسریںؔ سید