Dasht e Hijran Mein Na Saya , Na Sada Tere Bad Kitne Tanha Hein Tere Aabla Paa Tere Bad

دشتِ ہجراں میں نہ سایہ، نہ صدا تیرے بعد
کتنے تنہا ہیں تیرے آبلہ پا تیرے بعد
Dasht e Hijran Mein Na Saya , Na Sada Tere Bad
Kitne Tanha Hein Tere Aabla Paa Tere Bad
لب پہ اک حرفِ طلب تھا، نہ رہا تیرے بعد
دل میں تاثیر کی خواہش نہ دعا تیرے بعد

عکس و آئینہ میں اب ربط ہو کیا تیرے بعد
ہم تو پھرتے ہیں خود اپنے سے خفا تیرے بعد

درد سینے میں ہوا نوحہ سرا تیرے بعد
دل کی دھڑکن ہے کہ ماتم کی صدا تیرے بعد

اک قیامت کی خراشیں میرے چہرے پہ سجیں
اک محشر میرے اندر سے اُٹھا تیرے بعد

تُو کہ سمٹا تو رگِ جاں کی حدوں میں سمٹا
میں کہ بکھرا تو سمیٹا نہ گیا تیرے بعد

ملنے والے کئی مفہوم پہن کر آئے
کوئی چہرہ بھی نہ آنکھوں نے پڑھا تیرے بعد

میری دکھتی ہوئی آنکھوں سے گواہی لینا
میں نے سوچا تجھے اپنے سے سوا تیرے بعد