Hesar e Ishq Hai , Dam e Haus Ki Baat Nahi Milan Hai Rooh Ka , Yeh Dastras Ki Baat Hai

حصارِ عشق ہے ، دامِ ہوس کی بات نہیں
ملن ہے روح کا، یہ دسترس کی بات نہیں
Hesar e Ishq Hai , Dam e Haus Ki Baat Nahi
Milan Hai Rooh Ka , Yeh Dastras Ki Baat Hai
زہے نصیب بصد شوق کر قیام یہاں
یہ دل کا تخت ہے، قید و قفس کی بات نہیں

درونِ دل بھی ہے اک جلترنگ نغمہ سرا
فقط یہ نغمۂ تارِ نفس کی بات نہیں

گمان تھا کہ سہولت سے بھول جاؤں گی
تجھے بُھلانا مگر میرے بس کی بات نہیں

ہے ڈور سانس کی بُننا بھی آئینہ سازی
ہو احتیاط، یہاں ٹس سے مس کی بات نہیں

چھڑا ہے ذکرِ مہ و انگبیں کا محفل میں
نہ کر گمان، ترے رُوپ رس کی بات نہیں

بنی ہوں نور کا منبع جلا کے تن اپنا
یہ روشنی ہے مری، خار و خس کی بات نہیں

نہ ہو گا سہل کہ ترکِ تعلقات کریں
ہے ناطہ صدیوں کا، اک دو برس کی بات نہیں

شمع پہ جلتے پتنگوں کا ذکر ہے نسرینؔ
ہمارے عشق میں بھنورے، مگس کی بات نہیں
نسرینؔ سید
Nasreen Sayed