Safar Hayat Ka Aakhir Ko Raegan Nikla Keh Tar Tar Mere Sar Ka Saeban Nikla

سفر حیات کا آخر کو رائیگاں نکلا
کہ تار تار مرے سر کا سائباں نکلا
Safar Hayat Ka Aakhir Ko Raegan Nikla
Keh Tar Tar Mere Sar Ka Saeban Nikla
تمام عمر مرے ساتھ ساتھ چلتا رہا
خوشی سے، کرب زیادہ ہی مہرباں نکلا

کڑے سفر کی مسافت کا حال مت پوچھو
تھی چند گام پہ منزل یہ دم جہاں نکلا

چلے تو ساتھ مگر بے خبر رہے اس سے
وہ فاصلہ سرِ منزل جو درمیاں نکلا

ہر ایک خواب کی تعبیر تھی تضاد لیے
محبتوں کا یہ احساس بھی گماں نکلا

خواہشات کے ایثار بے ثمر ہی رہے
تمام زیست کا عرصہ محض زیاں نکلا

نمٹ کے آئے کہیں ایک آزمائش سے
تو منتظر کہیں اک اور امتحاں نکلا

جگر کا زخم جو بگڑا تو پھر ہوا ناسور
بدن میں پھیل گیا اور کہاں کہاں نکلا

بڑی شدید تمنا تھی آسماں چھو لوں
قریب جا کے جو دیکھا تو بس دھواں نکلا
شگفتہ نعیم ہاشمی
Shagufta Naeem Hashmi