Hum Qafiya-o-Hum Radeef MUBTALA-E-DARD-E-DIL

ہم قافیہ و ہم ردیف
(مُبتلاۓ دردِ دِل)
حضرت بیدم شاہ وارثی
حضرت حیرت شاہ وارثی
********

کیا سُناۓ مُبتلاۓ دردِ دِل
کیا سُنو گے ماجراۓ دردِ دِل
آپ ہی نے درد بخشا ہے مُجھے
آپ ہی دیں گے دواۓ دردِ دِل
دردِ دِل سے زِندگی ہے زِندگی
جان صدقے دِل فِداۓ دردِ دِل
اِنتِہاۓ درد اِس کا نام ہے
دِل کو ڈھُونڈے اور نہ پاۓ دردِ دِل
موت کرتی ہے علاجِ اہلِ درد
دردِ دِل ہے خود دواۓ دردِ دِل
حضرتِ عیسٰی یہ اُن کا کام ہے
آپ کیا جانیں دواۓ دردِ دِل
ہم نے دِل سی چیز دے دی آپ کو
آپ کیا دیں گے سِواۓ دردِ دِل
دردِ دِل گر بانٹنے کی چیز ہو
بانٹ لیں اپنے پراۓ دردِ دِل
دردِ دِل پیدا ہُوا دِل کے لیۓ
اور دِل بیدم براۓ دردِ دِل۔۔۔!

********

کون اُن کو اب سُناۓ ماجراۓ دردِ دِل
کشمکش میں نزع کی ہے مُبتلاۓ دردِ دِل
دردِ دِل سے دِل کو اب اِتنی لگاوٹ ہو گئی
جب کمی دیکھی تڑپ اُٹھّا براۓ دردِ دِل
کِس قدر دونوں ہیں اب اِک دُوسرے پر مُبتلا
درد ہے دِل پر فِدا اور دِل فِداۓ دردِ دِل
حُسن کی دِلداریاں کیوں عِشق کا حِصّہ نہ ہوں
حُسن میں پِنہاں ہیں لاکھوں راز ہاۓ دردِ دِل
نامہ بر قدموں پہ تیرے دِل فِدا یہ تو بتا
سُن لِیا تھا اُس نے میرا ماجراۓ دردِ دِل
درد کی لذّت پہ دِل تو رفتہ رفتہ مِٹ گیا
اِک سُکُوتِ مُستقِل اب ہے بجاۓ دردِ دِل
ختم کر حیرت خُدارا داستانِ سوزِ غم
کون سُن سکتا ہے تیرا ماجراۓ دردِ دِل۔۔۔!