جب بھی ہنسنے کے زمانے آئے
زخم پھر یاد پرانے آئے
بارہا اُن کو منایا تو ہمیں
رُوٹھ جانے کے بہانے آئے
پھر مجھے ٹوٹ کے چاہا اُس نے
پھر بچھڑنے کے زمانے آئے
مسکرا کر ہمیں ملنے والے
زندگی بھر کو رُلانے آئے
تیری چاہت نے ٹھہرنے نہ دیا
راہ میں کتنے ٹھکانے آئے
تو نہیں ہے تو ہوا کا جھونکا
گھر کی زنجیر ہلانے آئے
دل بُجھا ہے نہ جلے ہیں خیمے
آپ کیوں جشن منانے آئے
اسی امید پہ جاگو یارو
اب وہ کس وقت نجانے آئے؟
راس آیا جنھیں صحرا محسن
اُن کی قسمت میں خزانے آئے
محسن نقوی
No comments:
Post a Comment