Bam e Akhlaq Se Pasti Mein Utarte Daikha

بامِ اخلاق سے پستی میں اُترتے دیکھا
میں نے انسان سے انسان کو مرتے دیکھا
پیار کی دُنیا کا بچپن سے بُنا تھا سپنا
جاگتی آنکھوں سے وہ خواب بکھرتے دیکھا
حُسن خود حُسن کی پہچان ہوا جاتا ہے
آئینہ عکس میں اپنے ہی سنوَرتے دیکھا
وقت کے شور میں باطل کو پنپتے پایا
حق کو الفاظ میں اظہار سے ڈرتے دیکھا
راہ تکتا رہا میں کوئی نہ آیا لیکن
رات دروازے سے اک سایہ گُزرتے دیکھا
اپنی ہستی سے مجھے ہو گئی نفرت ارشد
میں نے معصُوموں کو جب بُھوک سے مرتے دیکھا
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania