.jpg)
اک اجنبی سے کیسی ہوئی اُنسیت مجھے
دیتا ہے ہر ادا میں نئی تہنیت مجھے
اب تک اُٹھا رہا ہوں محبّت کا بوجھ میں
کچھ سوچ کر ہی آپ نے دی فوقیت مجھے
جلوے دکھا کے اتنی بڑی کائنات کے
آخر بتائی اس نے میری حیثیت مجھے
میرے لیے تو باعثِ اعزاز ہے یہ ہی
محفل میں دی ہے آپ نے جو اہمیت مجھے
اُس کو بھی مرگِ عشق کا صدمہ ہے اسقدر
صحرا میں آج قیس نے کی تعزیت مجھے
اب تو شبِ فراق سے الفت سی ہو گئی
دیتی ہے لطف درد کی یہ کیفیت مجھے
ارشد میں اپنے دور سے مایوس ہو چُکا
اک روز مار دے گی یہ ہی یاسیت مجھے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
No comments:
Post a Comment