Kia Apni Be-Basi Ki Koi Inteha Bhi Hai

کیا اپنی بے بسی کی کوئی انتہا بھی ہے
دُشمن ہے آسماں تو مُخالِف  ہَوا بھی ہے
ہنس کر ہر اک ستم پہ اُسے میں نے داد دی
سارا قصور اُس کا نہیں کُچھ میرا بھی ہے
دل میں ہے تُجھ کو پانے کی مُدّت سے آرزُو
خواہش ہے جُستجو ہے خُدا سے دُعا بھی ہے
کم زور اِس زمین پر پِستا رہا سدا
ہوتا  رہے گا ظلم ہمیشہ ہُوا بھی ہے
زِندہ  رکھا ہوا ہے مجھے اِس یقین نے
شیطاں ہے اُن کے ساتھ تو میرا خُدا بھی ہے
رکھتا ہے دل میں راز  کئی میرا ہم سفر
کہنے کو ساتھ ساتھ ہے لیکن جُدا بھی ہے
مایوس ہوں گے آپ بھی ارشد کو جان کر
گو آدمی بَھلا ہے مگر کُچھ بُرا بھی ہے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania