تُجھ سے بڑھ کر بھی حسیں اور کوئی کِیا ہو گا
تُجھ کو صدیوں تیرے خلّاق نے سوچا ہوگا
تُو وہ خواہش ہے حقیقت نہیں بن سکتی کبھی
ایک سپنا ہے جو جیون میں نہ پُورا ہو گا
کتنی چاہت سے بناۓ ہیں ترے نقش و نگار
جس مصوّر نے تیرا چہرہ بنایا ہو گا
دیکھتا ہوں تیری تصویر چُھپا کر اکثر
مجھ پہ واعظ کو کہیں شِرک کا دھوکا ہو گا
بس یہی سوچتے بے کار گُزاری یہ عُمر
تجھ سے مل کر کبھی ایسا کبھی ویسا ہو گا
اِس لیے بھی تو غزل لکھنے سے ڈرتا ہوں میں
میرا ہر شعر تیرے نام کا چرچا ہو گا
بد دُعا ہِجرِ مُسلسل کی لگی ہے ارشد
میں نے مَجنوں کو لڑکپن میں ستایا ہو گا
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
No comments:
Post a Comment