یار ہے مے کدہ ہے ساون ہے
"شام کا ایک دن معیّن ہے"
آۓ گھونگھٹ ہٹاۓ ہستی کا
حشر کی منتظر یہ دُلہن ہے
رات بجتی ہے ہجر کی پائل
ناچتا وحشتوں کا کنگن ہے
آنچ سے عشق کی بَنا چندن
آگ میں جل گیا تو کُندن ہے
موت ہے تیرا دُور ہو جانا
زیست تیرا انوپ درشن ہے
جسم بے چین رُوح کا گُنبد
اور دل آرزو کا مدفن ہے
توڑ سکتے نہیں کِلِک کر کے
پِیت ایسا اَٹُوٹ بندھن ہے
آپ سے آپ کیوں حجاب اتنا؟
عکس خُود اور خُود ہی درپن ہے
موت سے پہلے تُو نہیں مِلتا
موت کے بعد ہی تو جیون ہے
کاش رُک جائے شور بے ہنگم
سانس ارشد ہماری دُشمن ہے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
"شام کا ایک دن معیّن ہے"
بشکریہ برادر محترم خالد عرفان صاحب
No comments:
Post a Comment