Gham e Hijaran Ki Tere Pas Dawa Hai Keh Nahi Jan Bulb Hai Tera Beemar , Suna Hai Keh Nahi

غمِ ہجراں کی ترے پاس دوا ہے کہ نہیں
جاں بلب ہے ترا بیمار، سنا ہے کہ نہیں
Gham e Hijaran Ki Tere Pas Dawa Hai Keh Nahi
Jan Bulb Hai Tera Beemar , Suna Hai Keh Nahi
وہ جو آیا تھا تو دل لے کے گیا ہے کہ نہیں
جھانک لے سینے میں، کمبخت ذرا ہے کہ نہیں

مخمصے میں تری آہٹ نے مجھے ڈال دیا
یہ مرے دل کے دھڑکنے کی صدا ہے کہ نہیں

سامنے آنا، گزر جانا تغافل کرنا
کیا یہ دنیا میں قیامت کی سزا ہے کہ نہیں

اہل دل نے اُسے ڈُھونڈا، اُسے محسوس کیا
سوچتے ہی رہے کچھ لوگ، خدا ہے کہ نہیں

تم تو ناحق مری باتوں کا برا مان گئے
میں نے جو کچھ بھی کہا تم سے، بجا ہے کہ نہیں

آبرو جائے نہ اشکوں کی روانی سے نصیر
سوچتا ہوں، یہ محبت میں روا ہے کہ نہیں
پیر سید نصیرالدین نصیر شاہ گیلانی
Peer Sayed Naseer u Deen Naseer Shah Gailani