Dil Ke Mua'amilat Se Anjan Toh Na Tha Is Ghar Ka Fard Tha Koi Mehman Toh Na Tha

 

دِل کے معاملات سے ‘ انجان تو نہ تھا
اِس گھر کا فرد تھا کوئی مہمان تو نہ تھا
Dil Ke Mua'amilat Se Anjan Toh Na Tha
Is Ghar Ka Fard Tha Koi Mehman Toh Na Tha
تِھیں جن کے دَم سے رونقیں شہروں میں جا بسے
وَرنہ ،،، ہمارا گاؤں ‘ یُوں وِیران تو نہ تھا

بانہوں میں جب لیا اُسے‘ نادان تھا ضرور
جب چھوڑ کر گیا مُجھے‘ نادان تو نہ تھا

کٹ تو گیا ہے‘ کیسے کٹا، یہ نہ پُوچھئے
یارو ! سفر حیات کا آسان تو نہ تھا

نیلام گھر بنایا نہیں اپنی ذات کو
کمزور اِس قدر میرا ایمان تو نہ تھا

رَسماً ہی آ کے پُوچھتا فاروقؔ حالِ دل
کُچھ اِس میں اُس کی ذات کا نُقصان تو نہ تھا

(بابائے تھل)
(Baba e Thal)
فاروقؔ روکھڑی
Farooq Rokhri