Umar Jalwoun Mein Basar Ho Yeh Zarori Toh Nahi Har Shab Gham Ki Sahar Ho Yeh Zarori Toh Nahi

عمر جلووں میں بسر ہو یہ ضروری تو نہیں
ہر شب غم کی سحر ہو یہ ضروری تو نہیں
Umar Jalwoun Mein Basar Ho Yeh Zarori Toh Nahi
Har Shab Gham Ki Sahar Ho Yeh Zarori Toh Nahi
چشم ساقی سے پیو یا لب ساغر سے پیو
بے خودی آٹھوں پہر ہو یہ ضروری تو نہیں
نیند تو درد کے بستر پہ بھی آ سکتی ہے
ان کی آغوش میں سر ہو یہ ضروری تو نہیں
شیخ کرتا تو ہے مسجد میں خدا کو سجدے
اس کے سجدوں میں اثر ہو یہ ضروری تو نہیں
سب کی نظروں میں ہو ساقی یہ ضروری ہے مگر
سب پہ ساقی کی نظر ہو یہ ضروری تو نہیں
مے کشی کے لیے خاموش بھری محفل میں
صرف خیام کا گھر ہو یہ ضروری تو نہیں
خاموش غازی پوری
Khamosh Ghazi Puri