Woh Mere Paas Hai Kia Paas Bulaoun Usko Dil Mein Rehta Hai , Kahan Dhoondne Jaoun Usko

وہ مرے پاس ہے کیا پاس بلاؤں اس کو
دل میں رہتا ہے، کہاں ڈھونڈنے جاؤں اس کو
Woh Mere Paas Hai Kia Paas Bulaoun Usko
Dil Mein Rehta Hai , Kahan Dhoondne Jaoun Usko
آج پھر پہلی ملاقات سے آغاز کروں
آج پھر دور سے ہی دیکھ کے آؤں اس کو

قید کر لوں اسے آنکھوں کے نہاں خانے میں
چاہتا ہوں کہ کسی سے نہ ملاؤں اس کو

چلنا چاہے تو رکھے پاؤں مرے سینے پر
بیٹھنا چاہے تو آنکھوں پہ بٹھاؤں اس کو

وہ مجھے اتنا سبک اتنا سبک لگتا ہے
کبھی گر جائے تو پلکوں سے اٹھاؤں اس کو

مجھے معلوم ہے آخر کو جدا ہونا ہے
لیکن اک بار تو سینے سے لگاؤں اس کو

یاد سے اس کی نہیں خالی کوئی بھی لمحہ
پھر بھی ڈرتا ہوں کہیں بھول نہ جاؤں اس کو

مجھ پہ یہ راز اسی ایک حوالے سے کھلا
بات اس کی ہے مگر کیسے بتاؤں اس کو

یہ مرا دل، مرا دشمن مرا دیوانہ دل
چاہتا ہے کہ سبھی زخم دکھاؤں اس کو

آج تو دھوپ میں تیزی ہی بہت ہے ورنہ
اپنے سائے سے بھی شہزادؔ بچاؤں اس کو
شہزادؔ احمد
Shehzad Ahmad