Ho Jaaye Gi Jab Tum Se Shanasaayi Zara Aur Barrh Jaye Gi Shaayed Meri Tanhaayi Zara Aur

Ho Jaaye Gi Jab Tum Se Shanasaayi Zara Aur

Barrh Jaye Gi Shaayed Meri Tanhaayi Zara Aur

Kyun Khul Gae Logon Pe Meri Zaat Ke Asraar

Ay Kaash Keh Hoti Meri Gehraayi Zara Aur

Phir Haath Pe Zakhmon Ke Nishaan Gin Na sako Ge

Ye Uljhii Hoi Dor Jo Suljhaayi Zara Aur

Tardeed To Kar Sakta Tha Paile Gi Magar Aur

Iss Taur Bhi Hogi Teri Ruswaayi Zara aur

Kyun Tark-E-Talluq Bhi Kia Lout Bhi Aaya

Acha Tha Keh Hota Jo Wo Harjaayi Zara Aur

Hai Deep Teri Yaad Ka Roshan Abhi Dil Mein

Ye Khauf Hai Lekin Jo Hawa Aai Zara Aur

Larrna Wahin Dushman Se Jahan Ghayr Sako Tum

Jeeto Ge Tabhi Hogi Jo Paspaayi Zara Aur

Barrh Jaein Ge Kuch Aur Lahoo Bechne Wale

Ho Jay Agar Sheher Mein Mehengaayi Zara Aur

Ik Dobti Dharrkan Ki Sada Log Na Sun Lein

Kuch Der Ko Bajne Do Ye Shahnaayi Zara Aur.....!

 

**********NOMI**********