Raton Ko Tasawur Hai Unka Aur Chupke Chupke Rona Hai Ay Subah Ke Taare Tu Hi Bata Anjaam Mera Kia Hona Hai

Raton Ko Tasawur Hai Unka Aur Chupke Chupke Rona Hai
Ay Subah Ke Taare Tu Hi Bata Anjaam Mera Kia Hona Hai

In Nau-Ras Aankhon Walon Ka Kia Hansna Hai Kia Rona Hai
Barse Hoe Sache Moti Hain Bahta Hoa Khalis Sona Hai

Dil Ko Khoya Khud Bhi Khoe Dunya Khoi Deen Bhi Khoya
Ye Gum-Shudgi Hai Ik Din Ay Dost Tujhe Bhi Khona Hai

Tameez-e-Kamal-o-Nuqs Utha Ye Tou Raushan Hai Dunya Par
Main Chandan Hoon Tu Kundan Hai Main Mitti Hoon Tu Sona Hai

Tu Ye Na Samajh Lillah Keh Hai Taskeen Tere Deewano Ko
Wehshat Mein Hamara Hans Padna Dar-Asal Hamara Rona Hai

Matam Hai Meri Aawaaz Shikast-e-Saz-e-Dil-e-Sad-Para Ka
"Saghar" Mera Naghma Bhi Deepak Ke Suron Mein Rona Hai

 
Poet:Saghar Nizami
Source:
Book:Urdu Ki Chuni Hoi Ghazlen Page 73
Edition:1963 (Delhi)

 
Book:Rang-e-Ghazal Page 541
Edition:1988 (Lahore)