Subah Nuo Hum Tou Tere Saath Numayan Hongy

صُبحِ نَو ، ھم تو تیرے ساتھ نمایاں ھوں گے
اور ھوں گے ، جو ھلاکِ شبِ ھِجراں ھوں گے

میری وَحشت میں ، ابھی اور ترقی ھو گی
تیرے گیسُو تو ، ابھی اور پریشاں ھوں گے

آزمائے گا ، بہرحال ھمیں جبرِ حیات
ھم ابھی اور ، اسیرِ غمِ دوراں ھوں گے

عاشقی اور مراحل سے ، ابھی گزرے گی
امتحاں اور محبت کے ، میری جاں ھوں گے

قلب پاکیزہ نہاد و دل صافی دے گا
آئینہ ھم کو بنایا ھے تو ، حیراں ھوں گے

صدقۂ تیرگی ، شب سے گلہ سنج نہ ھو
کہ نئے چاند ، اِسی شب سے فروزاں ھوں گے

آج ھے ، جبر و تشدد کی حکومت ھم پر
کل ھمیں ، بیخ کُنِ قیصر و خاقاں ھوں گے

وہ کہ اوھام و خرافات کے ھیں صیدِ زبُوں
آخر ، اس دامِ غلامی سے گریزاں ھوں گے

صرف تاریخ کی رفتار ، بدل جائے گی
نئی تاریخ کے وارث ، یہی انساں ھوں گے

صدمۂ زیست کے شکوے نہ کر ، اے جانِ رئیس
بخدا یہ نہ ، تیرے درد کے درماں ھوں گے

رَئیس امروھوی