Raat Ka Intezar Kon Kare Aaj Kal Din Mein Kia Nahi Hota

حکیم مومن خان مومن، ڈاکٹر بشیر بدر
*************************

اثر اس کو ذرا نہیں ہوتا
رنج راحت فزا نہیں ہوتا

بے وفا کہنے کی شکایت ہے
تو بھی وعدہ وفا نہیں ہوتا

ذکرِ اغیار سے ہوا معلوم
حرفِ ناصح برا نہیں ہوتا

تم ہمارے کسی طرح نہ ہوئے
ورنہ دنیا میں کیا نہیں ہوتا

اس نے کیا جانے کیا کِیا لے کر
دل کسی کام کا نہیں ہوتا

نا رسائی سے دم رکے تو رکے
میں کسی سے خفا نہیں ہوتا

تم میرے پاس ہوتے ہو گویا
جب کوئی دوسرا نہیں ہوتا

حالِ دل یار کو لکھوں کیوں کر
ہاتھ دل سے جدا نہیں ہوتا

دامن اس کا جو ہے دراز تو ہو
دستِ عاشق رسا نہیں ہوتا

چارۂ دل سوائے صبر نہیں
سو تمہارے سوا نہیں ہوتا

صبر تھا ایک مونس ہجراں
سو وہ مدت سے اب نہیں ہوتا

کیوں سنے عرضِ مضطر اے مومن
صنم آخر خدا نہیں ہوتا

حکیم مومن خان مومن

**************

بے وفا با وفا نہیں ہوتا
ختم یہ فاصلہ نہیں ہوتا

کچھ تو مجبوریاں رہی ہوں گی
یوں کوئی بے وفا نہیں ہوتا

گفتگو ان سے روز ہوتی ہے
مدتوں سامنا نہیں ہوتا

جی بہت چاہتا ہے سچ بولیں
کیا کریں حوصلہ نہیں ہوتا

رات کا انتظار کون کرے
آج کل دن میں کیا نہیں ہوتا

ڈاکٹر بشیر بدر