Kahon Kia Aarzoo e Be-Dili Mujh Ko Kahan Tak Hai Mere Bazar Ki Ronaq Hi Saoda e Ziyan Tak Hai

کہُوں کیا آرزُوئے بے دِلی مُجھ کو کہاں تَک ہے
مِرے بازار کی رَونَق ہی سودائے زِیاں تَک ہے
وہ مے کَش ہُوں فَروغِ مے سے خود گُلزار بن جاؤں
ہَوائے گُل فِراقِ ساقیِ نامہرباں تک ہے
چَمَن اَفروز ہے صَیّاد میری خوشنوائی تک
رہی بِجلی کی بے تابی سو میرے آشِیاں تک ہے
وہ مُشتِ خاک ہُوں فیضِ پریشانی سے صَحرا ہُوں
نہ پُوچھو میری وُسْعَت کی زَمِیں سے آسماں تک ہے
جَرَس ہُوں نالہِ خوابِیدہ ہے میرے ہر رَگ و پے میں
یہ خاموشی مِری وَقتِ رحِیلِ کارواں تک ہے
سُکُونِ دِل سے سامانِ کَشُودِ کار پیدا کر
کہ عُقْدَہِ خاطِر گِرداب کا آبِ رواں تک ہے
چَمَن زارِ محبّت میں خموشی موت ہے بُلبُل
یہاں کی زِندَگی پابَندیِ رَسمِ فُغاں تک ہے
جوانی ہے تو ذَوقِ دِید بھی لُطفِ تَمَنّا بھی
ہمارے گھر کی آبادی قیامِ میہماں تک ہے
زمانے بھر میں رُسوا ہُوں مگر اے وائے نادانی
سَمَجھتا ہُوں کہ میرا عِشْق میرے رازداں تک ہے
حضرتِ اِقبالؒ
Hazrat e Iqbal 

****************************

خُدا جانے کہاں سے جلوَہِ جاناں کہاں تک ہے
وہِیں تک دیکھ سکتا ہے نَظَر جِس کی جہاں تک ہے
قَفَس کی تِیلیوں سے لے کے شاخِ آشِیاں تک ہے
مِری دُنیا یہاں سے ہے مِری دُنیا وہاں تک ہے
زَمِیں سے آسماں تک آسماں سے لامکاں تک ہے
خُدا جانے ہمارے عِشق کی دُنیا کہاں تک ہے
کوئی مر کر تو دیکھے اِمتِحاں گاہِ محبّت میں
کہ زیرِ خنجر قاتِل حیاتِ جاوداں تک ہے
نیاز و ناز کی رُوداد حُسن و عِشق کا قِصّہ
یہ جو کُچھ بھی ہے سب اُن کی ہماری داستاں تک ہے
قَفَس میں بھی وہی خوابِ پریشاں دیکھتا ہُوں مَیں
کہ جیسے بِجلیوں کی رَو فَلَک سے آشِیاں تک ہے
خیالِ یار نے تو آتے ہی گُم کر دیا مُجھ کو
یہی ہے اِبتِدا تو اِنتِہا اِس کی کہاں تک ہے
جوانی اور پِھر اُن کی جوانی اے معاذ اللہ
مِرا دِل کِیا تہ و بالا نِظامِ دو جہاں تک ہے
ہم اِتنا بھی نہ سمجھے عقل کھوئی دِل گنوا بیٹھے
کہ حُسن و عِشق کی دُنیا کہاں سے ہے کہاں تک ہے
وہ سر اور غیر کے دَر پر جُھکے توبہ معاذ اللہ
کہ جِس سر کی رسائی تیرے سنگِ آستاں تک ہے
یہ کِس کی لاش بے گور و کفن پامال ہوتی ہے
زَمِیں جُنبِش میں ہے بَرہم نِظامِ آسماں تک ہے
جِدھر دیکھو اُدھر بِکھرے ہیں تِنکے آشیانے کے
مِری بربادِیوں کا سِلسِلہ یارب کہاں تک ہے
نہ میری سخت جانی پِھر نہ اُن کی تیغ کا دَم خَم
مَیں اُس کے اِمتِحاں تک ہُوں وہ میرے اِمتِحاں تک ہے
زَمِیں سے آسماں تک ایک سنّاٹے کا عالم ہے
نہِیں معلُوم میرے دِل کی ویرانی کہاں تک ہے
سِتم گر تُجھ سے اُمِیدِ کرم ہوگی جِنہیں ہوگی
ہمیں تو دیکھنا یہ تھا کہ تُو ظالِم کہاں تک ہے
نہیں اہلِ زَمِیں پر مُنحصِر ماتم شہیدوں کا
قبائے نِیلگُوں پہنے فضائے آسماں تک ہے
سُنا ہے صُوفِیوں سے ہم نے اکثر خانقاہوں میں
کہ یہ رنگِیں بیانی بیدمؔ رنگیں بیاں تک ہے
حضرتِ بیدمؒ
Hazrat e Bedam