Khamosh zindagi jo basar kar rahe hain hum Gehre samundaron mein safar kar rahe hain hum

خاموش زندگی جو بسر کر رہے ہیں ہم
گہرے سمندروں میں سفر کر رہے ہیں ہم

صدیوں تک اہتمام شب ہجر میں رہے
صدیوں سے انتظار سحر کر رہے ہیں ہم

ذرے کے زخم دل پہ توجہ کیے بغیر
درمان درد شمس و قمر کر رہے ہیں ہم

ہر چند ناز حسن پہ غالب نہ آ سکے
کچھ اور معرکے ہیں جو سر کر رہے ہیں ہم

صبح ازل سے شام ابد تک ہے ایک دن
یہ دن تڑپ تڑپ کے بسر کر رہے ہیں ہم

کوئی پکارتا ہے ہر اک حادثے کے ساتھ
تخلیق کائنات دگر کر رہے ہیں ہم

لکھ لکھ کے اشک و خوں سے حکایات زندگی
آرائش کتاب بشر کر رہے ہیں ہم

ہم اپنی زندگی تو بسر کر چکے رئیسؔ
یہ کس کی زیست ہے جو بسر کر رہے ہیں ہم
رئیسؔ امروہوی

Khamosh zindagi jo basar kar rahe hain hum
Gehre samundaron mein safar kar rahe hain hum

Sadiyon tak ehtimam e shab e hijr mein rahe
Sadiyon se intizar e sehr kar rahe hain hum

Zarre ke zakhm e dil pe tawajju kiye baghair
Darman e dard e shams o qamar kar rahe hain hum

Harchand naz e husn pe ghalib na aa sake
Kuch aur ma’rke hain jo sar kar rahe hain hum

Subh e azal se sham e abad tak hai aik din
Ye din tadap tadap ke basar kar rahe hain hum

Koi pukarta hai har ek hadise ke sath
Takhleeq e kaiynat e digar kar rahe hain hum

Likh likh ke ashk o khoon se hikayat e zindagi
Ara’ish e kitab e bashar kar rahe hain hum

Hum apni zindagi to basar kar chuke Raees
Ye kis ki zeest hai jo basar kar rahe hain hum
Raees Amrohvi