Ghazlon Ki Dhanak Aodh Mere Shoula Badan Tu Hai Mera Sukhan Tu Mera Mouzo e Sukhan Tu

غزلوں کی دھنک اوڑھ میرے شعلہ بدن تُو
ہے میرا سخن تُو میرا موضوعِ سخن تُو

کلیوں کی طرح پُھوٹ سرِ شاخِ تمنا
خوشبُو کی طرح پھیل چمن تا بہ چمن تُو

نازل ہو کبھی ذہن پہ آیات کی صُورت
آیات میں ڈھل جا کبھی جبریلِ دَہن تُو

اب کیوں نہ سجاؤں ، میں تجھے دیدۂ و دل میں
لگتا ےہ اندھیرے میں سویرے کی کرن تُو

پہلے نہ کوئی رَمزِ سخن تھی، نہ کنایہ
اب نقطۂ تکمیل ہنر _ محورِ فن تُو

یہ کم تو نہیں تُو میرا معیار نظر ہے
اے دوست، میرے واسطے کچھ اور نہ بن تُو

ممکن ہو تو رہنے دے مجھے ظلمتِ جاں میں
ڈھونڈے گا کہاں چاندنی راتوں کا کفن تُو
محسن نقوی