Main Ne Chand Aur Sitaron Ki Tamanna Ki Thi Mujh Ko Raton Ki Siahi Ke Sewa Kuch Na Mila

مَیں نے چاند اور ستاروں کی تمنا کی تھی
مجھ کو راتوں کی سیاہی کے سوا کچھ نہ مِلا
Main Ne Chand Aur Sitaron Ki Tamanna Ki Thi
Mujh Ko Raton Ki Siahi Ke Sewa Kuch Na Mila
مَیں وہ نغمہ ہوں جسے پیار کی محفل نہ مِلی
وہ مسافر ہوں جسے کوئی بھی منزل نہ مِلی
زخم پائے ہیں بہاروں کی تمنا کی تھی

کسی گیسو، کسی آنچل کا سہارا بھی نہیں
راستے مِیں کوئی دُھندلا سا ستارہ بھی نہیں
میری نظروں نے نظاروں کی تمنا کی تھی

دل مِیں ناکام اُمیدوں کے بسیرے پائے
روشنی لینے کو نکلا تو اندھیرے پائے
رنگ اور نُور کے دھاروں کی تمنا کی تھی

میری راہوں سے جدا ہو گئیں راہیں اُن کی
آج بدلی نظر آتی ہیں نگاہیں اُن کی
جن سے اِس دل نے سہاروں کی تمنا کی تھی

پیار مانگا تو سسکتے ہُوئے ارمان مِلے
چین چاہا تو اُمڈتے ہُوئے طُوفان مِلے
ڈُوبتے دل نے کناروں کی تمنا کی تھی
ساحرؔ لدھیانوی
Sahir Ludhyanvi