Dil Ke Veerane Mein Ik Shor e Dagar Baqi Hai Koi Beeta Hoa Lamha Bhi Magar Baqi Hai

دل کے ویرانے میں اک شورِ دگر باقی ہے
کوئی بیتا ہوا لمحہ بھی مگر باقی ہے
Dil Ke Veerane Mein Ik Shor e Dagar Baqi Hai
Koi Beeta Hoa Lamha Bhi Magar Baqi Hai
یہ الگ بات کہ تعبیر تو ہاتھ آئی نہیں
آنکھ میں خواب کا دھندلا سا اثر باقی ہے

ہمسفر سارے جدا ہو گئے کب کے لیکن
راہ تکتی ہوئی اک گردِ سفر باقی ہے

وہ جو اک شخص مری روح میں اترا ہوا تھا
اس کے جانے کا ابھی دل پہ اثر باقی ہے

روز ہی پوچھتے ہیں پاؤں کے چھالے مجھ سے
کچھ بتاؤ بھی ہمیں کتنا سفر باقی ہے

کتنی صدیوں سے اندھیروں کو دیا ہے تاوان
یہ مرا ظرف ہے امیدِ سحر باقی ہے

اتنی مایوس بتا ہجر سے کیوں ہے مہوش
عشق زندہ ہے وفاؤں کا ہنر باقی ہے
مہوش ملک
Mehwish Malik