Hawa Ke Wastay Ik Kam Chodh Aaya Hon Diya Jala Ke Sar Sham Chodh Aaya Hon

ہوا کے واسطے اک کام چھوڑ آیا ہوں
دیا جلا کے سر شام چھوڑ آیا ہوں
Hawa Ke Wastay Ik Kam Chodh Aaya Hon
Diya Jala Ke Sar Sham Chodh Aaya Hon
کبھی نصیب ہو فرصت تو اس کو پڑھ لینا
وہ ایک خط جو ترے نام چھوڑ آیا ہوں

ہوائے دشت و بیاباں بھی مجھ سے برہم ہے
میں اپنے گھر کے در و بام چھوڑ آیا ہوں

کوئی چراغ سر رہگزر نہیں نہ سہی
میں نقش پا کو بہر گام چھوڑ آیا ہوں

ابھی تو اور بہت اس پہ تبصرے ہوں گے
میں گفتگو میں جو ابہام چھوڑ آیا ہوں

یہ کم نہیں ہے وضاحت مری اسیری کی
پروں کے رنگ تہہ دام چھوڑ آیا ہوں

وہاں سے ایک قدم بھی نہ جا سکی آگے
جہاں پہ گردش ایام چھوڑ آیا ہوں

مجھے جو ڈھونڈھنا چاہے، وہ ڈھونڈھ لے اعجازؔ
کہ اب میں کوچۂ گمنام چھوڑ آیا ہوں
اعجازؔ رحمانی
Aijaz Rehmani