Saz Furqat Peh Ghazal Gao Keh Kuch Raat Katay Piyar Ki Rasm Ko Chamkao Keh Kuch Raat Katay

ساز فرقت پہ غزل گاؤ کہ کچھ رات کٹے
پیار کی رسم کو چمکاؤ کہ کچھ رات کٹے
Saz Furqat Peh Ghazal Gao Keh Kuch Raat Katay
Piyar Ki Rasm Ko Chamkao Keh Kuch Raat Katay
جب یہ طے ہے کہ غم عشق بہت کافی ہے
غم کا مفہوم ہی سمجھاؤ کہ کچھ رات کٹے

صبح کے ساتھ ہی ہم خود بھی بکھر جائیں گے
دو گھڑی اور ٹھہر جاؤ کہ کچھ رات کٹے

دامن درد پہ بکھرے ہوئے آنسو کی طرح
میری پلکوں پہ بھی لہراؤ کہ کچھ رات کٹے

ذکر گلزار سہی قصۂ دل دار سہی
زخم کے پھول ہی مہکاؤ کہ کچھ رات کٹے

ایک ایک درد کے سینے میں اتر کر دیکھو
ایک ایک سانس میں لہراؤ کہ کچھ رات کٹے

دل کی وادی میں ہے تاریک گھٹاؤں کا ہجوم
چاندنی بن کے نکھر جاؤ _ کہ کچھ رات کٹے

قاتل شہر سے بچ کر میں ابھی آیا ہوں
میں اکیلا ہوں، چلے آؤ کہ کچھ رات کٹے

فرش کرنوں کا بچھا دے گی سحر آ کے رئیسؔ
دل کےزخموں کوبھی چمکاؤکہ کچھ رات کٹے
رئیسؔ اختر
Raees Akhtar