Qadar-e-Johar Hai Jo Pindaar Samait Mujhko Parkho Mere Mayaar Samait

Qadar-e-Johar Hai Jo Pindaar Samait
Mujhko Parkho Mere Mayaar Samait

Roz Maangain Ye Dua Khaana-Badosh
Ghar Na Ujray Dar-o-Deewaar Samait

Kitni Banjar Howi Fasl-e-Aawaaz
Sheher Chup Chaap Hai Baazaar Samait

Kaash Loogon Ki Tarah Soye Chaman
Hum Bhi Jaayein Kubhi Dildaar Samait

Kon Karta Qad-o-Qaamat Ka Hisaab
Ik Qayaamat Tha Woh Raftaar Samait

Jin Ki Haibat Se Hirasan Lashkar
Be-Nishaan Ab Hain Woh Talwaar Samait

Bujh Jaayein Kahein Aankhain Meri
Yaad Aa , Mashal-e-Rukhsaar Samait

Khaak Urti Howi Sadyon Se Udhar
Qaaflay Gum Howay Saalaar Samait

Hawas-e-Darham-Dinaar Ki Khair
Loog Biknay Lagay Kirdaar Samait

Main Ke Mohsin Hon Shaheed-e-Naamoos
Dafan Karna Mujhe Dastaar Samait

Mohsin Naqvi